İndividiualizm və insan həyatının mənası anlayışının fəlsəfi təhlili

Abstract

Fəlsəfi fikir tarixində əhəmiyyətini itirməyən və daima müzakirə olunan önəmli məsələlərdən biri də insan və onun mahiyyəti məsələsidir.Bu məsələ müasir dövrdə də ön planda göstərilərək aktual bir problem kimi araşdırılır.İnsan fenomeninin özünəməxsusluğu,unikallığı ona elmlər sistemində xüsusi və sistemli yanaşmağı tələb edir.Humanitar elmlər sistemində insan,fərd anlayışının öyrənilməsi aspektləri kifayət qədər zəngin və çoxşaxəlidir,belə ki, həmin elmlərdə insan sosial sistemlərin əsas komponenti, onların elementar və universal daşıyıcısı, cəmiyyətin başlıca məhsuldar qüvvəsi, tarixi prosesin subyekti, tərbiyə predmeti və s. kimi araşdırılır. İnsanın öyrənilməsi meyarları yalnız humanitar elmlərdə deyil, həmçinin təbiət elmləri sahəsində də zəngindir. Təbiətşünaslığın müxtəlif sahələrində insan bioloji təkamülün məhsulu,orqanizm, spesifik genetik proqrama və müəyyən dəyişmələr diapazonuna malik təbii fərd kimi tədqiq olunur. İnsanın həyatı,individuallıq və bu kimi məsələlər fəlsəfənin prizmasından daha zəngin, mürəkkəb və rəngarəng görünür. Buna görə də “insan nədir?” sualı, onun varlığının sirri və mənası məsələsi həmişə filosofların diqqət mərkəzində duran ən aktual məsələlərdən olmuşdur. Qədim Yunan filosofu Xilonun təbirincə desək, fəlsəfi düşüncələrə qatılan hər bir insan üçün onun özündən daha maraqlı bir obyekt yoxdur. Yəni bu fikirləri şərh edərkən görərik ki, insan mürəkkəb biososial struktura malik bir varlıqdır,həmçinin maddi və mənəvi dünyası, fəlsəfi və təbii-elmi fikri müxtəlif suallarla zənginləşdirən unikal bir fenomendir